Nga data 14-16 qershor 2024, në Tiranë u mbajt me sukses Konferenca dhe Ceremonia e zyrtarizimit të Distriktit 2485, Shqipëri-Kosovë. Jemi krenarë që marrim pjesë dhe dhurojmë në Konferenca e parë e Distriktit të ri 2485 (Shqipëri-Kosovë), një rast i rëndësishëm që shënon lindjen e një kapitulli të ri.

Kjo ngjarje e paharrueshme shënoi realizimin e një ëndrre të disa dekadave për shqiptarët, duke i bashkuar nën ombrellën e një organizate globale që daton nga viti 1905 dhe i ka rrënjët në shërbim, integritet dhe paqe.

Shqipëria dhe Kosova janë tashmë një organ i vetëm në Rotari International, duke realizuar një synim të hershëm të bashkimit të Rotarianëve Shqiptarë për të zbatuar projekte madhore në shërbim të komuniteteve të të dy vendeve.

Ndërsa mblidhemi me kolegë vizionarë, udhëheqës dhe krijues të ndryshimeve, ne reflektojmë për angazhimin tonë të përbashkët për shërbimin, rritjen dhe ndikimin. Së bashku, ne krijojmë lidhje që kapërcejnë kufijtë, duke na bashkuar në qëllim.